|
Har
bir inson (u xoh yaxshi bo‘lsin, xoh yomon) baxtli hayot kechirishni
istaydi. G‘am-qayg‘udan, tashvishdan yiroq bo‘lishni xohlaydi. Ammo...
oyning o‘n beshi yorug‘ bo‘lsa, o‘n beshi qorong‘u. "Yorug‘ kunlarni
umid bilan kutib yashashning o‘zi ham bir baxt”, deydi ba’zilar.
Siz-chi, siz baxtni qanday tasavvur qilasiz?
* * *
Baxt!..
Bu so‘z juda tansiq, ayni paytda ko‘p ishlatiladi. Huda-behuda bu
so‘zni tilga olaveramiz. Arzimas narsadan sevinib, "Men hammadan
baxtiyorman!” deguvchilarning son-sanog‘i yo‘q. "Baxtlimisiz?” degan
savolni duch kelgan odamga beraveramiz. Ammo tayinli javob olish o‘ta
mushkul. Negaki, har kim baxtni o‘zicha tasavvur qiladi. Kimdir ko‘ngil
xotirjamligini baxt deb bilsa, kimdir — molu davlatni. Yana kimdir
murod-maqsadiga yetsa, "Shu emasmi baxt?” deydi. Biroq...
"Baxtga
yetishish yo‘llarini izlash ham baxt”, — degan ekan bir donishmand.
O‘ylab ko‘ring, siz uchun baxt nima?! Qanday voqea ro‘y bersa,
o‘zingizni baxtli sanaysiz? Universitetga kirsangiz, armoningiz
qolmaydimi? Sevganingiz bilan turmush qursangiz, murod-maqsadingizga
yetasizmi? To‘la-to‘kis hayot kechirsangiz, tashvishingiz bo‘lmaydimi?..
Yaxshilab o‘ylang, qachon topasiz baxtingizni?
Tasavvur
qiling: Siz boy-badavlat, jamiyatda yuksak obro‘-e’tiborga ega odamsiz.
Qo‘lingizni qayoqqa uzatsangiz, yetadi. Sizni boshiga ko‘taradigan, bor
mehrini bag‘ishlaydigan yaqinlaringiz, yoru do‘stlaringiz atrofingizda
parvona. Hech nimadan kamchiligingiz yo‘q. Xullas, aytganingiz aytgan,
deganingiz degan. Shumi siz uchun baxt?! Bir kunmas, bir kun bunday
hayot joningizga tegib ketadi-ku! Hayot tashvishlarini qo‘msab qolasiz.
Nimaningdir orzusida kuyib-yonishni istaysiz. O‘sha ko‘zingizga "baxt”
bo‘lib ko‘ringan narsa aslida sarob ekanligi ma’lum bo‘ladi. Ana
shunaqa, baxt to‘kin-sochin, betashvish hayot kechirish emas. Bu
so‘zning ma’nosi juda keng. Ba’zan shu oddiy so‘zni anglash uchun bir
insonning umri kerak bo‘ladi.
Siz
o‘zingiz sevgan sohada qizg‘in faoliyat yurityapsiz. Bu — baxt!
Kimnidir devonalarcha sevib qoldingiz. Qalbingizda ezgu tuyg‘ular
uyg‘ondi. Bu — baxt! Siz shayton vasvasalariga uchmaysiz, doimo vijdon
amriga qarab ish tutasiz. Bu ham baxt! Kimgadir yaxshilik qildingiz. U
endi sizni umr bo‘yi duo qiladi. Bu — baxt! Ayrim odamlar kabi o‘z
manfaatingizni o‘ylab emas, elu yurt, xalq uchun yashayapsiz. Bu ham
baxt! Do‘stingizni og‘ir, daldaga muhtoj paytda suyab qo‘ydingiz, tirgak
bo‘ldingiz. U sizga ishonish mumkinligini his qildi. Bu ham baxt
emasmi?!
Bunday
vaziyatlarning yana bir talayini misol qilib ko‘rsatish mumkin. Har
birimizning hayotimizda ko‘nglimizga taskin beradigan, yo‘limizni
yoritadigan nurli nuqtalar bor. Shunday ekan, nega tushkunlikka
tushasiz? Nega o‘zingizni baxtsiz sanaysiz?
Hozirgacha
inson qachon va qanday holatda o‘zini baxtiyor his qilishini aniq aytib
bera oladigan donishmand topilmagan. Shunday bo‘lsa-da, hayoti davomida
ma’lum tajribaga ega bo‘lib, baxt haqidagi o‘z tasavvurlarini bayon
etishgan. Ehtimol, inson o‘zini baxtli sezishi uchun ko‘p narsalarni
o‘rganishi, tushunishi, o‘zgalarning dardini his qila olishi, kuyinishi,
dardiga darmon bo‘la olishi kerakdir. Balki, shundagina inson baxt
nimaligini anglab yetar. Ehtimol, siz uchun qo‘l yetmas olisda ko‘ringan
baxtingiz yonginangizdadir.
Atrofingizdagilarga, qolaversa, qalbingizga bir nazar tashlab ko‘ring-a! Ajabmas, dunyodagi eng baxtiyor inson siz bo‘lsangiz!.. |
