O‘zbekiston Milliy matbuot markazida mamlakatimiz axborot-kutubxona va axborot - resurs markazlari faoliyatini takomillashtirish va xizmat ko‘rsatish sifatini yanada yaxshilash borasidagi ustuvor vazifalar ijrosiga bag‘ishlangan matbuot anjumani bo‘lib o‘tdi. Respublika axborot-kutubxona markazi tomonidan tashkil etilgan tadbirda mazkur soha mutaxassislari, ommaviy axborot vositalari vakillari ishtirok etdi.

Kutubxonalar necha asrlar davomida insoniyatga qimmatli bilim olish va uni kelajak avlodlarga yetkazish vositasi sifatida xizmat qilib kelmoqda. Bugungi kunda kutubxonalar jahon miqyosida kitobxonlarga bepul xizmat ko‘rsatadigan eng gavjum madaniyat o‘choqlariga aylandi. O‘zbekistonda mustaqillik yillarida barcha sohalarda amalga oshirilayotgan yangilanishlar kutubxonalarning ham jamiyatdagi o‘rni va ahamiyatini o‘zgartirdi. Bugungi kun ularning ishini innovatsiyalar asosida tashkil etish, turli toifadagi foydalanuvchilarga xizmat ko‘rsatishning yangi shakl va usullarini, kutubxona faoliyatining yangi yo‘nalish hamda vositalarini izlab topishni taqozo etmoqda.

– Mamlakatimizning barcha hududlarida zamonaviy axborot-kutubxona va axborot-resurs markazlarining tashkil etilgani aholi, ayniqsa, yoshlarning ilmiy, intellektual va kasbiy salohiyatini yuksaltirishga xizmat qilmoqda, – deydi Respublika axborot-kutubxona markazi direktori Alisher Eshmatov. – Prezidentimizning 2006-yil 20-iyunda qabul qilingan "Respublika aholisini axborot-kutubxona bilan ta’minlashni tashkil etish to‘g‘risida”gi qarori bunda muhim omil bo‘layotir. Qarorga muvofiq, Qoraqalpog‘iston Respublikasi, viloyatlar va Toshkent shahridagi jami 14 ta ommaviy kutubxona O‘zbekiston aloqa va axborotlashtirish agentligi tasarrufiga o‘tkazilib, ularning negizida axborot-kutubxona markazlari faoliyati yo‘lga qo‘yildi.

Bu axborot-kutubxona markazlari uchun turli vazirlik va idoralarning hududiy axborot-kutubxona muassasalariga uslubiy yordam berish hamda aholiga zamonaviy axborot texnologiyalari asosida sifat jihatidan yangi xizmatlar ko‘rsatish imkonini yaratdi. Axborot-kutubxona markazlarida kitoblar fondini doimiy ravishda yangilash va to‘ldirib borish, ilmiy-ma’rifiy, badiiy kitoblar, noyob asarlarning elektron shaklini yaratish, kitobxonlarga tezkor va sifatli axborot-kutubxona xizmatlarini ko‘rsatish borasida keng ko‘lamli ishlar amalga oshirilmoqda.

Bugungi kunda axborot-kutubxona markazlarining kitob fondi 5 millionga yaqin nusxani tashkil etadi, har yili bu ko‘rsatkich o‘rtacha 12 ming nusxaga ko‘paymoqda. Axborot-kutubxona markazlari tashkil etilganidan buyon ulardan foydalanadigan o‘quvchilar soni 270 mingga yetdi, ularning 50 foizdan ortig‘i esa yoshlardir. Axborot-kutubxona markazlarini bosqichma-bosqich internet va "ZiyoNET” tarmoqlariga ulash ishlariga katta e’tibor qaratilmoqda. O‘quv zallarida o‘rnatilgan 340 dan ortiq bo‘linmalarda tashkil etilgan avtomatlashtirilgan ish joylaridagi 170 ta kompyuter lokal tarmoqqa ulangan bo‘lib, kitobxonlarning ushbu tarmoqdan foydalanishi uchun imkoniyat yaratilgan.

Axborot-kutubxona muassasalarining me’yoriy-huquqiy bazasini mustahkamlash maqsadida 2011-yil 13-aprelda O‘zbekiston Respublikasining "Axborot-kutubxona faoliyati to‘g‘risida”gi qonuni qabul qilindi. Qonunda axborot-kutubxona fondlarini shakllantirish, ularning saqlanishini ta’minlash, elektron katalog va kutubxonalar yaratish, AKT asosida axborot-kutubxona resurslaridan birgalikda foydalanish va almashishga doir normalar belgilangan.

O‘zbekiston Respublikasi Prezidentining 2011-yil 23-fevralda qabul qilingan "2011-2015 yillarda axborot-kutubxona va axborot-resurs xizmatini axborot-kommunikatsion texnologiyalar asosida sifatli rivojlantirish chora-tadbirlari to‘g‘risida”gi qaroriga muvofiq, o‘tgan yili sohaga axborot, kutubxonachilik va noshirlik ishlari bo‘yicha davlatlararo standartlar tizimiga kiradigan 3 ta davlat standartini joriy qilish ishlari boshlandi. Ushbu standartlar elektron kutubxonalar faoliyati, mualliflik huquqini himoya qilish belgisi, shuningdek, elektron axborot-kutubxona resurslarining bibliografik tavsifini aniq belgilab beradi.

Matbuot anjumanida jurnalistlar o‘zlarini qiziqtirgan savollarga javob oldilar.